خبز منزلي بالصاج

عيش بالصاج

خبز يعني العيش بكلامنا نحن السودانيين بس العيش هنا في الخليج بقصدو بيه الرز (سبحان الله) إختلاف في المصطلحات والمفاهيم. 

مما عرفت الوصفة دي من سنتين تقريبا وأنا ما بشتري عيش نهائي بقيت أعمله في البيت بكمية وبحتفظ بيه في الفريزر بطلع منه الكمية العاوزاها وبسخنه في شعلة البتوجاز العادية وبيرجع كأنه مخبوز يدوب سخن وطري.

أنا بفضل أخلط دقيق القمح الكامل مع الدقيق العادي يلا على المكونات:

كبايتين دقيق قمح (كوب معياري 250مل)

كبايتين دقيق عادي 

ملعقة صغيرة ملح أو على حسب الذوق

كبايتين موية دافية 

ملعقة كبيرة خميرة

ملعقة كبيرة سكر

فنجان قهوة زيت 

الطريقة:

* الخميرة لمن تكون حبيبات كبيرة لازم نخليها تتفاعل في الأول بعدين نشتغل بيها والموية تكون دافية لأنها لو سخنة حتموت الخميرة ولو بارده ما ح تتفاعل بسرعة. الخميرة والسكر ومعاهم كباية موية حركتها بالملعقة شوية بعدين خليتها 10 دقايق لغاية ما حجمها تضاعف.

* كبيت الدقيق والملح والزيت وخلطتهم بيدي شوية عشان الزيت يتشرب كويس ونزلت كباية الخميرة وكباية الموية وبديت عجن. 

* العجن لازم يكون على الأقل خمس دقايق لغاية ما العجين يبقى ناعم وما يلصق في اليد.

* رشيت شوية دقيق وعملت أسطوانة كبيرة من الجين وقسمتها لجزئين. كل جزء قسمتو ل8 قطع صغيرة.

* شكلت القطع دي لدواير ورصيتها وغطيتها بكيس لمدة ربع ساعة عشان تتخمر للمرة الأولي.

* رشيت دقيق وفردت كور العجين بسمك نص سنتمتر تقريبا ورصيتها وغطيتها تاني لمدة 20 دقيقة.

* سخنت الصاج (ولازم يكون سخن شديد) وبديت أخبز العيش يلا ملاحظات مهمة جدا جدا... عشان العيشة تتنفخ لازم أول ما أرميها في الصاج ثواني بس أقلبها قبل ما تطلع فقاقيع لأنه لو طلعتها وننجضت بجانب واحد ما ح تتنفخ.

تاني ملاحظة إنه لو العيشة اتخرمت ح تطلع البخار وما ح تتنفخ برضو فشنو بجيب قطعة نضيفة واقفل بيها مكان الخرم عشان تتنفخ كويس وتنجض. 

عيش الصاج